انا والقطار

دى خواطر كتبتها من فترة عن القطر

**********

طول عمرى غاوية سفر..........وما بارساليش على بر
اقابل كتير مالبشر ..........ولكل واحد سطر
فى كتاب حياتى اتسطر ..........وناس بتاخد شطر
فى قصيدة الفتها ..........وكتبتها فالقطر
***********
القطر دا ملهمى..........فى قصايدى او فى النثر
جواه باعيش احلام..........وابنيلى مليون قصر
جواه كتير مالناس..........وفى كل واحد سر
لو تنتبه لكلامهم ..........هاتلاقى حلو ومر
***********
ناس عايشة زى حالاتى ..........من قطر رايحة لقطر
وناس لاول مرة ..........فى حياتها تركب قطر
فى الآخر كله نازل ..........فى محطة من غير شر
لكن سؤالى ياقطرى ..........انا امتى هالقى البر

بقلم:

ميمو هانم السنجأدار

حسبى الله ونعم الوكيل فيك يافخرى

 اولا السلام عليكم ورحمة الله

فخرى ده هو لقب عملته لكل واحد بيقابلنى فى حياتى وبيتحكم فيا سواء لمنصبه او لاحتياجى له

بس بصراحة انا دايما باوصفهم بفخرى لما يكونو مش حلوين معايا

فخرى ممكن يكون رئيسى فالشغل او وزير الصحة 

او موظف الحسابات اللى مطلع عينينا

او حتى سواق الميكروباص

هههههههههه

مش مهم هو مين 

المهم ان كل واحد فينا عنده فخرى فى حياته

وممكن يكونو اكتر من فخرى فى اكتر من مكان وزمان

فى البيت فى الشغل فى النادى اوحتى فى الشارع كلهم باوجهلهم الخواطر دى

********

إلى (اللى مش عزيزى) فخرى
******

اخص عليك يافخرى .............انا منك جبت آخرى
دايما مطلع عينى..............ولا مرة كنت دوغرى
*******
ظلمك مالوش نهاية..............وايه حكايتك معايا
كل ما اديلك ظهرى ..............تدينى على قفايا
*******
دايما بتظلم فيا ............قلبك مليان قسية
طبعك نيلة ورخامة .............وتموت كده فالاذية
*******
يخرب بيتك ياسيدى............دايما كاسرلى ايدى
وكمان كاسر رقبتى............وقاطع بايديك وريدى
*******
مستحلى تشوف دمانا ..............وواخدنا على عمانا
كنت فاكراك بتفهم .................وهاتصون الامانة
*******
قلوبنا كانت معاك .............وعقولنا كانت فى ايدك
لكن فرطت فيها .............مالجهل الله يزيدك
*******
روح منك للى خلقك.............قادر ياخدلى حقى
يديك على قد عملك.............ياخد منك مايبقى

بقلم :
ميمو هانم السنجأدار

عيد ميلاد نيابتى

دى خواطر كتبتها بمناسبة مرور سنة على استلامى النيابة


سنة عدت عالنيابة ................والله إحنا غلابة
ماشيين دايرين فى ساقية................وبتنهشنا الديابة
*****
سنة عدت فالعذاب ده .................يارب توب علينا
تايهين بين ده ومابين ده ..................كلو مطلع عنينا
*****
مين قال الطب نعمة ................دا الطب علينا نقمة
وياريته يجيب فلوس .................فالفقر وصلنا قمة
*****
ونخش بقى عالماستر ................منه يارب سلم
دماغنا فيه بتتكسر ................قال ايه كده بنتعلم!!
*****
لا دكاترة يعبرونا ................ولا شغلنا بيتقدر
طالع عنين ابونا .................والجاى يا اخواننا اكتر
*****
سنة كنت فيها عبرة ................لكل اللى يشوفونى
قال ايه بيقولو خبرة!!!..................دى طلعت من عيونى
*****
لكن هارجع واقول .............احلى سنة فى حياتى
اصحابى كانو فيها .............سبب صبرى وسكاتى
*****
اصحابى اللى قابلتهم ................كانو احلى حاجة فيها
غير انى مش هاشوفهم .................مافى حاجة اندم عليها
*****
هارجع لبيتى تانى .................وهاسيب اسكندرية
واتمنى ماتنسونى .................يا اغلى الناس عليا
*****
****
***

بقلم:

ميمو هانم السنجأدار

إســتــفــتـــــــــــــــاح

 بسم الله الرحمن الرحيم

السلام عليكم ورحمة الله

ابدأ اولى محاولاتى للكتابة فى هذه المدونة

وارجو من الله التوفيق