سؤال لازم نسأله لنفسنا دلوقتى
ماذا بعد؟
بعد ثورة الشباب ما بدأت يوم 25 يناير
بعد الاحداث اللى حصلت او بالاحرى المهازل اللى سقط نتيجتها شهداء كتير من شباب البلد دى
بعد ماتشكلت لجان واتعملت اجتماعات بين الحكومة والمعارضة وكل اطراف الحوار
بعد ما بدأ القيام ببعض الخطوات لتغير الدستور وتغيير حال البلد
بعد ما مبارك اتنحى النهارده
ايوه بعد ما اتنحى
لفظ فى اعتقادى لو كان حصل من اسبوعين بس كانت البلد اتوفر عليها كتير جدا من الدم والعرق والمجهود والسهر والتعب
اكيد كلنا دلوقتى سعداء باللى حصل لانه بيترجم بالافعال لا الاقوال ان الشعب المصرى قادر يغير كل شئ فى البلد بارادته وعزمه الشديد
لكن هانرجع ونقول
ماذا بعد؟
لأن التغيير اللى حصل فالبلد دلوقتى لازم يكمل ومايقفش عند تنحى الرئيس السابق
(الله .......حلوة قوى الرئيس السابق دى .عشت وشفتها فيكى يا مصر)
التغيير لازم يكمل ويشمل كل شئ فالبلد دى
مش بس النظام الحاكم والدستور والادارات التشريعية والتنفيذية
لا .........التغيير لازم يشمل النفوس
ايوه لازم التغيير يشملنا كلنا من جوا مش من برا
لازم كل واحد قال شعار وطنى ولا غنى غنوة وطنية او هتف فى مظاهرة يكون فعلا قد اللى قاله
لازم نثبت اننا رجالة ونقدر نقف ونتحدى اى مصاعب تواجهنا عشان نبنى بلدنا من جديد
كل واحد فينا لازم يقف قدام المراية دلوقتى ويشوف حاله ويحدد هو ناوى يبقى ايه؟
يبقى جحر يدخل فى جدار لبناء مصر
ولا حجر يترمى عليها ويكسر فيها ويجرحها
لازم كل واحد فينا يتعاهد مع نفسه امام الله انه يتغير من جواه للاحسن
لازم يبطل يكذب ويسرق ويظلم ويتهاون فى عمله ويتهرب من مسؤلياته ويرمى فشله على شماعه الظروف
لازم يحارب شرور نفسه قبل مايحارب الاشرار
ولازم كلنا نتعلم من اللى حصل وبيحصل وهايحصل
لان ده هو اللى هايوصلنا للطريق الصح
ويحط رجلينا على اول درجة فى سلم النجاح
وفى الآخر ماقدرش اقول غير تحيا مصر
